Alzheimer
Papà picchì mi talii e nun dici nenti,
l’ucchiuzzi sunnu assenti,
la vucca chiusa e senza pitittu
e u corpu senza rizzettu.
Taliassimi sugnu so figlia
parlassimi ancora muvissi li ciglia.
Vossia era un omu importanti,
cumbattì in guerra e lu cuntava a tutti quanti,
dicennu: -“ ca li cannuna e li scupetti
sunnu armi ca fannu nesciri matti.”
Nun parli chiù, nun mi cunta nenti
sinni sta supra stu divanu…
Lu pigghianu, lu lavanu, lu civanu
e vossia nun grapi vucca
pari un acidduzzu ammartucatu.
Chista malatia alzaimer è na brutta cosa,
si campa accussi comu una cosa,
nun si capisci nenti di la vita
e di comu si passa la iurnata,
è presenti … ma assenti talia a tutti
e nun dici nenti… mi mettu vicinu a iddu … mi dici:
– “cu si tu? Picchì nun ti levi?”
Papà sugnu so figghia
vinissi ca l’abbrazzu tanticchedda
facissisi stringiri o me pettu
quantu sentu ancora un pocu d’affettu,
l’occhi mi si inchinu di lacrimi,
la gutta m’acchiana nun pozzu parlari,
u cori miu è chinu di duluri.
Quannu pensu ca fu iddu ca mi insignà a caminari,
a parlari , a vulirici beni … ora è ridduttu comu un vegetali …
e nun pozzu fari nenti pi putillu sarvari.
Gina Capraro