PENSU… E SONNU

Assittata davanti a la finestra

vidu ‘na nuvula ca passa,

non si ni va,

resta pi fàrimi cumpagnia.

Lu silenziu fa di patruni

a li mè pinseri,

scrivu ‘nta ‘stu fogghiu la me vita

passata ‘ntra duluri,

sònnira e silenzi…

Pensu a tia matri,  

a li tò biddizzi,

mi pari di sèntiri ancora… lu to ciàuru,

lu ciàuru di linzola,

lu ciàuru di manciari,

pensu… a tutti li paroli

ca non ti dissi,

a ‘stu tempu

ca mi sciddicau di li manu,

a la to vucca

ca era sempri ‘na pagina di storia,

a tutti li ‘nsignamenti

ca mi dasti

e quannu non dicevi nenti,

eranu l’occhi

ca parravanu pi tia,

dd’occhi…

ca s’astutarunu alleggiu alleggiu, 

pensu… a la paci

ca chiù non haiu avutu,

a ‘ddu rusariu

ca sgranasti e non finisti,

pensu… e sonnu

di èssiri ‘na matri comu a tia.

 ANGELA BONO   (DIRITTI RISERVATI)