A festa di Morti 

Quannu s’avvicinava 

lu jornu di Murticeddi

era na gran festa 

pi nuatri nicareddi.

La strata si incheva

cu tanti bancareddi

chini di tanti joca

pi masculi e fimmineddi.

All’angulu di la strata

c’era lu panillaru

castagni e frutta sicca

vinneva u siminzaru.

Nte barri li vitrina

si inchevanu di ducizza

l’occhi si sgranavanu

p’accussì tanta biddizza.

La frutta marturana

taralli e autri viscotti

li pupi di zucchiru

e puru l’ossa di morti.

Cu anzia s’aspittava

lu jornu di li Morti

ma a pigghiari sonnu

nun s’arrinisceva da notti.

Lu jornu era un vuciari

di tanti picciriddi

cu joca e robbi novi

pi strata e ne vaneddi.

Si rispirava un’aria

d’amuri e simplicità

tra nuatri nicareddi

e granni d’ogni età.

Nun mancavanu li risati

quannu tra iddi granni

dicevanu: chi ti purtaru i morti?

Un pupu cu l’anchi torti!

Eranu assai beddi

di tempi ormai passati

si nuatri li ricurdamu 

nun vennu mai scurdati. 

Rosaria Lo Bono

02/11/2018