LUSTRU DI LUNA
Chi lustru di luna chi c’è ni sta nuttata,
mentri anticchia di ventu s’appoia supra lu mari.
Mi sentu stanca,
lu tempu si purtò li megghiu anni
e allura m’affacciu a la finestra,
pi nun pinzari a nenti
Lu friscu porta ciavuru di mari
e di ricordi antichi e nun pozzu fari o’ menu
di pinzari a tia, figghiu miu,
chi ti nn’isti luntanu a travagghiari.
Vulissi essiri na varca, na pampina d’aliva
pi vulari supra stu ventu e viniriti a pigghiari
e comu di picciriddu, manu pi manuzza,
ti purtassi cantannu a la marina,
di cursa, scinnennu a tri a tri tutti li scaluna,
pi taliari ‘n funnu a lu mari
pi l’urtima vota stu lustru di luna.
Emilia Merenda
Dal mio libro “Senza tempu” 2018
