I STIDDI SUTTA SALI
Quannu u celu
stiddatu to mari si misi
a spicchiari,
‘na pocu ri stiddi
to mari vosi jttari.
Ntall’acqua cuminciaru
a ballari
e anciovi e sardi vosiru
addivintari
e quannu ‘nte riti,
ri nostri patri,
arristavanu impigghiati,
ri stiddi d’argentu
‘u mari vinieva ‘spupiatu.
E quannu me patri
na cascitiedda ri stiddi
a casa purtava
cu delicatizza
li scapuzzava
p’un li fari malutrattari.
E poi testa e cura
i mittieva e n’a manciata
‘i sali grossu
ci jttava e arrieri testa
e cura cuntinuava…
E quannu a lanna
si inchieva
un cupiecchiu ri lignu
ci mittieva
e ‘na pietra grossa
e pisanti ci pusava .
Poi ogni tantu
li sculava pì un paru
ri misi s’aspittava
e cu sulu ciavuru ti saziavi.
