La baronessa di Carini
Chistu è nu cuntu di storia e di mimori
diversu di chiddu ca la genti senti e voli
na vicenna di na fimmina bedda di cori
frisca, giuvani e sanzera comu un ciuri.
Sbucciau a Carini, Laura era lu so nomi
Cesari, sò patri, Lanza facìa di cugnomi
la vardava a vista di quarchi scialaratu
pinzannu on riccuni di daricci a lu latu.
Nuddi trasìa mai a lu sò gran casteddu
sulu parenti e iddu armatu di cuteddu
ma Laura si sintìu lu cori pigghiari focu
quannu vitti trasiri n’omu a lu sò locu.
Si chiamava Ludovicu, era sò cuscinu
cu l’arma vivaci, parìa mriacu di vinu
e tirannuci na pitrudda dù finistruni
attiraù ‘nto secunnu la so attinziuni.
E iddu cu sguardu curnutiscu ci rirìu
ci scaccìau l’occhiu e lu cori si cucìu
e ‘nta du peri d’arvulu r’alivi rallatu
s’arrampicau facennu assai piccatu.
Laura e Ludovicu pirderu la testa
tutti i siri amucciuni facianu festa
ma poi so patri purtau scumpigghiu
e la obbrigau senza gran cunsigghiu.
Ci retti pì maritu lu baruni Vincenzu
era riccu, lariu, a idda ci facìa sensu
ma poi dintra a Chiesa misi li sò peri
e si lu maritau purtannulu all’artari.
Ma a Ludovicu cu lu sò manteddu
Laura mai si livava da lu ciriveddu
e si sò maritu partìa pì na simana
lu facìa chiamari comu na suvrana.
Ottu figghi ficiru ‘nta cunvivenza
e sirici anni d’amuri cu suffirenza
Cesari sapìa e pì gran cunvinienza
vruricava cu pacenzia la cuscienza.
A Ludovicu iddu ci facìa l’inchinu
picchì ci pristau sordi ‘nto jardinu
e quannu nun ci li potti ristituiri
s’appattau cu enniru pì fallu muriri.
Sì Ludovicu ammazzatu d’anuri murìa
lu debbitu cancillatu pì sempri vinìa
e lu maritu li beni di l’amanti ricivìa
e la liggi di tannu nenti a iddi ci facìa.
Soggiru e enniru cu sennu e puntu
ficiru cumplottu senza fari scuntu
finceru di partiri tutti ‘nsemmula
e s’ammucciaru darrè na prevula.
E quannu Ludovicu si vitti cu Laura
ravanzi a dui tistimoni scerti cu cura
ammazzaru prima a iddu cu primura
e poi a idda cu la manu nfacci i mura.
Doppu ca Laura e Ludovicu foru morti
maritu e patri o processu foru assorti
ricivennu puru n’apprausu pì da sorti
e du tituli nubiliari di conti da la corti.
Ma la manu da Baronissa di Carini
cu lu sangu chi niscìu da li so vini
ancora ‘nta ddi mura si viri a vista
e quarcunu ancora dici cu è chista?
Chista? Ma di cui staiu parrannu?
Ma di la baronissa chi va vagannu
pì li stanzi du Casteddu ogn’annu
e grira a tutti chiddi ca nun sannu:
“Iu e Ludovicu nun fomu ammazzati
p’essiri stati filici e assai ‘nnamurati
ma pì siti di sordi, robba e gran putiri
ma sta virità nun si sapi e nun si viri!”.
Francesco Billeci 14-04-2020
