LU TRAVAGGHIU
Lu travagghiu è pani
e cû travagghiu nun si babbìa,
nun si vinni, nun s’accatta,
nun si trova nta putìa.
Lu travagghiu è dirittu
sacrusantu d’ogni omu,
e ‘stu dirittu nun si scripenta
nun si scafazza comu un ovu.
Lu travagghiu è dignità,
è sustegnu dâ famigghia
pi chiddi chi pensanu, legginu
e nun mancianu canigghia.
Lu travagghiu è libirtà,
e cu lu dici nun è foddi,
l’omu senza travagghiu
havi lu chiaccu nta lu coddu
L’omu e lu travagghiu
li fici ‘nsemmula lu Signuri,
lu travagghiu è pi la vita
nun si cancia p’un favuri.
L’omu senza travagghiu
è un arvulu senza radichi
e cu guverna è responsabili,
nun po’ diri ca nun lu sapi!
Francesco Ferrante
