Na varca senza mari
Stiornu nun vogghiu pinzeri chini di rimpiantu
picciutteddu bonu sugnu e mi nni vantu
e poi me muggheri nun sbagghia, avi raggiuni
me patri è vecchiù, nun po’stari ‘nta n’agnuni.
Nt’ospizziu ci dunanu arenzia e lu vonnu puru beni
joca e carti, chiacchìarìa puru a iddu ci cummeni
nun è mai sulu, comu ‘nto ciramu o na granni scola
e poi lu lavanu, lu pettinanu, ci cancianu li linzola.
Valiggìa e machina sunnu pronti, saluta a tutti patri
Pirchì talii a futugrafìa da bon’arma di me matri?
I primi jorna, e poi ti passa affannu e sugghiuzzu
Poi sempri tilifunari, nun stai carennu dintra un puzzu!
Ormai l’ebbica canciau, camina avanti la giuventù
ci su chiffari, s’arresti dintra, pì tìa cu ci pensa cchiù?
Ci veni puru me figghiu, lu viaggiu è longu, assai è la strata
Si tuttu va beni arrivamu ddà prima ra scurata.
Lu viri quantu è bellu cà, ora ti pò ripusari
da finestra si ci fai casu, si viri puru ù mari
abbrazzami e rammi na vasata patri, n’amu a salutari
pirchì chianci ‘n silenziu e mi rici “nun mi lassari”?
Po’, a braccettu cu lu ‘n firmeri lu taliu alluntanari
Me figghiu rici “oi a mìa, dumani a tìa, nun ti ‘ngustiari”
Ma pirchì mi sentu un duluri forti dintra u pettu?
Forsi chissu nun è vuliri beni e sensu di rispettu?
Lu cori chiama cori, lu sangu è chinu di faiddi
chiovi, lampìa, forsi è me matri ca chianci da li stiddi?
Allura tornu narrè, curru cchiù forti di lu ventu
arma, cori e menti nun mi dannu abbentu.
Pigghia la truscia patri e lassamu sti quattro mura
l’arma mi grira, ascuta lu beni ca pì tìa svapura
senza di tìa nun vogghiu stari e mancu campari:
pirchì un figghiu senza patri è comu na varca senza mari.
