Cálati juncu

E doppu un mmernu travistutu di primavera

arrivò ‘na primavera siddiata e ncupunata di negghi.

Nta l’ariu ô postu di li rìnnini

volanu sbardi di pinzeri

assammarati di scantu

e nta li strati tampasíanu mascari d’un fausu carnilivari.

Attangáti nne nostri casi

stamu caláti comu lu juncu ca aspetta chi passa la china.

E intantu la záara d’aranciu va scattannu

e lu rusetu tra spini e buttuna di çiuri crisci

comu si nenti stassi ammattennu.

Vincenzo Aiello

………………………………………………………

La vurza di la fimmina

’Na cosa ch’è pi veru mistiriusa

e fa nfuddìri lu me ciriveddu

è ’a vurza ch’apparteni a la me spusa

zoccu cci nfili vola, com’aceddu

Lu vurzillìnu, ’i chiavi, lu russettu

appena cci li nfili, nt’on fallanti

comu si’ a jucàri ammucciarèddu

dda rintra vi scumparinu all’istanti

Ammàtula pirdìti li jurnati

a sbutuliàri tutt’û cuntinutu

cuminci nni l’autunnu e juntu â stati

Si ancora dda chi cerchi, e un’ha’ finutu

senza attruvari mai zoccu circati

c’’u çiriveddu menzu camulutu!!

Vincenzo Aiello

……………………………………………………..

A mia madre e a tutte le mamme del mondo e del cielo

“L’occhi di me matri”

Quannu l’occhi di me matri

brillavano comu ’n mari a lu tramuntu

’a so vucca annacava canzuni spinzirati

p’’i so figghi … p’’u so amuri…

E cincu voti ’a mammàna nta so casa.

E cincu voti vuçi ’i duluri e cuntintizza.

E cincu voti pannizzi stisi o suli.

E cincu voti culostra d’’i so minni p’’u nutricu.

’Na vita di strittizzi ma cuntenti

li jorna çiancu a çiancu a lu so omu.

Cu la so manu ’i mastra custurera

cu quattru pezzi ’i robba ’miricana

puntiava pi nuatri nicareddi

cammìsi…gonnellini… cravatteddi

pi fàrinni jiri sempri assistimati.

’A lana travagghiata cu li busi

nta li so manu d’oru addivintava

quasetti pi la notti o ’na sciallina

birritti pi la nivi c’’u giummiddu

e manticeddi di tanti culura

ca ’i notti m’arricriavanu ’i qualura.

Li vitti astutari ddu jornu

l’occhi di me matri

lu jornu ca me patri un ci fu cchiù

e puru s’’a so vucca

di jornu scaccaniava

passava tutti ’i notti

assammarari ’u cuscinu di lacrimi.

Mi lu cunfirò mentri si nni java

cu l’occhi ca cci brillavano nautra vota

cuntenta di jiri ’ncontru a lu so amuri

ca l’aspittava a çiancu d’’u Signuri.

Vincenzo Aiello