DAMI, PALATINI E CAVALERI
Quannu ji era nica
mi ricordu ca,
estati e ‘mmernu
e a passu cu’ so’ sceccu,
passava spissuliddu
‘u zzu Tanu cu’ carrettu.
Passava, certu,
quannu si rricurdava
o comu diciva iddu,
a ccu’ c’addumannava,
“un jornu sì e un jornu no”
abbastava capiri, però,
qual’era ‘u jornu sì
e qual’era chiddu no.
Vinniva frutta e virdura
ca mancu li cani…
tantu nun si putiva taliari
ma, sciacquati comu ‘u suli,
calia, simenza
e nuciddi atturrati,
‘un mancavanu mai.
A nu’ avutri picciriddi, però,
cchiù di lu sciccareddu
o di la so’ mercanzia,
frisca o addimurata ca era,
n’attiravanu li fijuri
di dami, palatini e cavaleri
ca, cu’ culura sgargiati
ma orama’ stinciuti,
‘nte scianchi di lignu
di ddu carrettu sciarrancatu,
cu amuri e mmaistrìa,
avìanu pittatu.
(©M.Teresa Lentini, 2020, inedita)
