U DIVANU SFUNNÀ
Si continua sta quarantena
mi tocca cangiallu, anchi si, mi fa pena
picchì a forza di stari assittatu
dunni posu u culu è tuttu sfunnatu.
Quannu mi susu e talìu darré
viu un gran fossu ca pari u’ retré*
l’agiustu e cci mettu na cosa sutta
pari perfettu si nuddru s’assetta.
Chista è ‘na cosa p’accummidari
appena ci’àppoiu metti a sfunnari
si veni un ospiti mi pari vrigogna
nun è divanu, ma un nidu ‘i cicogna.
A stu puntu mi pozzu priparari
u divanu novu ma ghiri accattari
tantu nun ce versu di ricuminciari
armenu finu a Pasqua a casa àm’a stari.
Pietro Pinzarrone