15 82 37
Si tutti avemu un nomu un cugnomu e na dignità personali, chissa è na cosa di cuntari e chi
un si po scurdari, è na storia vera assai luntanu e la scrivu pi Ciru Campiscianu.
Avìa vintanni appena ed era beddru forti, chinu di speranzi e cu na vita
davanti.
Ma un gnornu cc’iarrivà un cartulinu e ci cancià lu so distinu; e lu ligìa
e riligia tra li mani, cu la speranza ‘ntà lu cori di sbagliari.
Però lu motivu era veru e sempri chiddru, tutti còsi
avìa a lassari e partiri pi militari.
Chissa unn’era na vacanza e mancu na villigiatura, e la partenza fu
acccussì allura ca nun sapia quali era la via e ‘ntà quali terra ia. Po l’urtimu
salutu a la stazioni e so matri l’abbrazzà forti
a lu so cori.
Ma quantu picciotti stannu acchianannu ‘ntà stu trenu, nun ci vogliu
cridiri e nun è veru, ma tu scrivimi prestu e nun mi fari
stari cu pinseri.
E tra lacrimi tantu scrusciu e fumu di carvuni, lu trenu si muvìu e partìu,
ma un si sapi pi dunni e quali terra, picchì chidda era la guerra.
Tanti anni po passaru e lu trenu a la stazioni sempri frisca, ma nun arrivanu
cchiù nutizi e mancu littri. E so matri sempri a la porta pi
taliari e a stu figliu vidilu arrivari.
Ma iddru è troppu luntanu e la matri nun po sentiri li peni e lu so chiantu,
picchì è prigiuneru ntà lu campu. Ora è arridduttu peddi e ossa
e a la fami, picchì cu un chilu di pani ci manciavanu
ottu cristiani.
Ormai ci livaru ogni umanu aspettu e porta lu nomu scrittu ‘ntà lu pettu,
va caminannu cu li zocculi di lignu senza cozetti
e si chiama 15 – 82 -37.
Carmelo Campisciano