A me’ nonna cu tuttu lu cori
Ci vulissi iri arre’
nta casa di me’ nonna.
Trasire cu la stissa spinsiratizza
di quannu era picciridda
quannu m’ abbastava
un pezzu di cioccolatu
e lu pani a fedde cu l’ogghiu e lu zuccaru
Acchianari ddi scaluneddi
e addifennimi dda vita
d ‘arreri lu so falaru sciuratu.
Ora ca sugnu granni lu capisciu
ca quannu me nonna
m’ arriria lu facia cu tuttu lu cori
e si scurdava li so’ malanni.
Picchistu mi dicia
tu si la me’ gioia .
Ma quannu lu capivu iu
ci lu dissi a lu campusantu
cu li fresi mmanu
ca eranu li sciuri ca piacinu a idda.
Si mi chiuiu l ‘ occhi
a viu ancora allisciari
li so’ pianti no’ finistruni
paria un jardinu ca parrava cu lu suli.
Quantu vulissi sentiri ancora la so’ vuci
e cu dda manuzza
ca era nica e duci comu a idda
allisciari lu me’ cori
ca la vita arridduci a sculapasta.
Rosanna Badalamenti
Diritti d’autore riservati